https://www.innews.az/uploads/news/2025-04/_innews_e6e9ac827a5fb14e30bde0a6a_o.jpg
Şimali Kipr Türk Respublikasının Türk Dövlətləri Təşkilatında Müşahidəçi Statusu: Azərbaycanın Qardaşlıq Duruşu
Əbədi Birlik Gənclər İctimai Birliyinin sədri Şahin Əliyev
Azərbaycan bir daha sübut etdi ki, türklüyün hər bir dəyəri onun üçün əziz və müqəddəsdir. Azərbaycan Respublikasının Prezidenti cənab İlham Əliyevin ADA Universitetində keçirilən "Yeni dünya nizamına doğru" mövzusunda beynəlxalq forumda etdiyi çıxış, dövlətimizin Türk dünyasına və xüsusilə də Şimali Kipr Türk Respublikasına olan səmimi münasibətini və prinsipial mövqeyini bir daha nümayiş etdirdi.
Prezident İlham Əliyevin qeyd etdiyi kimi, Azərbaycan Şimali Kiprin Türk Dövlətləri Təşkilatında müşahidəçi statusu almasında fəal rol oynayıb. Bu, təsadüfi və ya formal bir yanaşma deyil, dərin tarixi, siyasi və qardaşlıq münasibətlərinə söykənən bir mövqedir. Şimali Kipr Türk Respublikasının bayrağının Şuşada dalğalanması isə, yalnız bir simvol deyil, həm də bir mesajdır – Türk dünyası böyük bir ailədir və bu ailədə heç kəs unudulmur.
Azərbaycanın siyasəti açıq və şəffafdır. Bizim bu istiqamətdə heç bir gizli gündəmimiz yoxdur. Əksinə, bizim məqsədimiz birdir – Türk dövlətlərinin birliyini və həmrəyliyini möhkəmləndirmək, qardaş ölkələrin suverenliyini və müstəqilliyini beynəlxalq səviyyədə tanıtmaq.
Prezident İlham Əliyevin vurğuladığı bir başqa vacib məqam isə, BMT Baş katibinin təşəbbüsü ilə keçirilən Kipr referendumu idi. Bu referendumda Türkiyə Kipri – yəni Şimali Kipr birləşməyə "hə" dedi, amma yunan Kipri buna qarşı çıxdı. Nəticədə isə, beynəlxalq ədalət prinsiplərinə zidd olaraq, cəzalandırılmalı olan tərəf mükafatlandırıldı və Yunan Kipri Avropa İttifaqına qəbul edildi. Bu, beynəlxalq sistemdə ikili standartların və siyasi riyakarlığın açıq nümunəsidir.
Bu gün biz Şimali Kipr Türk Respublikasına yalnız dəstək verməklə kifayətlənmirik, həm də onun beynəlxalq hüquqlarının bərpası üçün bütün tribunaları səfərbər edirik. Çünki onlar buna layiqdirlər – tarixləri, mədəniyyətləri, mübarizələri və qardaşlıqları ilə.
Azərbaycanın bu sahədə atdığı addımlar sadəcə diplomatik jest deyil, həm də Türk dünyasının gələcəyi üçün atılan strateji və tarixi addımlardır. Biz inanırıq ki, bu birliyin sarsılmaz dayaqları var və bu dayaqlardan biri də məhz Şimali Kipr olacaq.
Nə qədər ki, biz varıq, Şimali Kipr Türk Respublikası yalnız olmayacaq. Onun müstəqilliyi və tanınması üçün mübarizə davam edəcək – çünki bu mübarizə bir millətin haqq və ədalət uğrunda mübarizəsidir.
Ən son xəbərləri səhifəmizdən də izləyin
