https://www.innews.az/uploads/news/2022-09/_innews_788111872701e5c1feacddee4_o.jpg
Azərbaycan Respublikasının Vəkillər Kollegiyası və Mediasiya Şurası arasında olan səmərəli əməkdaşlığın davamı olaraq vəkil büroları və mediasiya təşkilatları arasında əməkdaşlığa başlanılıb.
"Mediasiya haqqında" Azərbaycan Respublikasının Qanununa görə, mediatorlar və yaxud da mediasiya təşkilatları vətəndaşlara hüquq məsləhətləri verə bilməz və hüquq xidmətləri göstərə bilməz. Ölkəmizdə isə keyfiyyətli hüquqi xidmətlərin göstərilməsində müstəsna rolu olan vəkillərlə əməkdaşlıq Mediasiya Şurasının proritetlərindən biri olub. Vəkillər Kollegiyasının Rəyasət Heyətinin sədri Anar Bağırov və Mediasiya Şurasının İdarə Heyətinin sədri Nadir Adilov arasında imzalanmış müvafiq sazişin tələblərinə uyğun olaraq maraq konfiliktlərinin qarşısının alınması, mediatorlar və vəkillərin qarşılıqlı və sıx əlaqədə işləməsi və onların əməkdaşlığı nəticəsində barışıq sazişlərinin keyfiyyətinin və həcminin artması əsas prioritetlərdən biridir.
Yuxarıda qeyd edilənlərlə əlaqədar olaraq Şəki 1 saylı Mediasiya Təşkilatı ilə Şəki Regional Vəkil Bürosu arasında 14 sentyabr 2022-ci il tarixində əməkdaşlığa dair tədbir keçirilmişdir.
Şəki 1 saylı Mediasiya Təşkilatının direktoru Dərya Yaşarlının bildirdiyinə görə, görüşdə Şəki 1 saylı Mediasiya Təşkilatının rəhbəri qismində özü də daxil olmaqla, Şəki Regional Vəkillər Bürosunun müdiri Xəyal İbrahimov, həmçinin mediator Rəfael Cabbarov, mediator-vəkil Elburus Məmmədov, vəkillər Səbuhi Rəcəbov, Emil Əliyev, Tural Əfəndizadə, Musa Sarıyev, Fərid Əliyev və Zaur Bayramov iştirak etmişlər. Birgə keçirilən tədbir zamanı vəkillərin və mediatorların qarşılıqlı əməkdaşlığı, bir-birlərinə necə kömək edə bilmələri, vətəndaş məmnunluğunun birgə artırılması, keyfiyyətli mediasiya və hüquq xidmətlərinin göstərilməsi sahəsində davamlı uğurların əldə edilməsi, vəkillərin və mediatorların peşə fəaliyyətinin həyata keçirilməsi zamanı nəzərə alınmalı olan prinsiplərə riayət edilməsi, həmçinin mediasiya və vəkillik fəaliyyətində şəxslər arasında maraq toqquşmasının qarşısının alınması kimi məsələlər, mövcud problemlər və sair müzakirə edilmişdir.
Həmçinin, bu sahədə kifayət qədər uğurların əldə edilməsi ilə bağlı Mediasiya Şurası və Vəkillər Kollegiyasının çox sıx və səmərəli əməkdaşlıq etdikləri, bütün qayğıları və problemləri birlikdə çevik müzakirə edərək həll etdikləri tədbir iştirakçılarının diqqətinə çatdırılmışdır. Bu kimi tədbirlərin təşkil edilməsi onu deməyə əsas verir ki, mediatorlar və vəkillər bu məsələlərdə nəinki çox gözəl əməkdaşlıq qurmuş, hətta mövcud problemlərin həllinə daha fundamental yanaşmağı üstün tutmuşlar. Mediatorlarla vəkillərin sıx və səmərəli əməkdaşlığı bundan sonra da davam edəcək və birlikdə məhkəmə-hüquq islahatlarına dəstək ola biləcək bütün vasitələr tətbiq ediləcəkdir. Vəkillər və mediatorlar birgə böyük və həmrəy bir ailədir, hər birimiz bu ailənin üzvüyük və vətəndaş məmnunluğu bizim birgə həmrəyliyimizdən asılıdır.
Ən son xəbərləri səhifəmizdən də izləyin
