SOCAR-ın BANM-də 20 Yanvar faciəsinin 35-ci ildönümünə həsr olunmuş anım tədbiri keçirilib

Tədbir iştirakçıları qanlı Yanvar faciəsi zamanı həlak olan Şəhidlərin əziz xatirəsini bir dəqiqəlik sükutla yad ediblər.

Anım tədbirində çıxış edən Ümumi işlər üzrə prorektor Babək Məmmədov 20 Yanvar faciəsinin xalqımızın azadlıq və müstəqillik yolunda göstərdiyi qəhrəmanlıq və milli iradənin təcəssümü olduğunu vurğulayıb. O, bu faciənin xalqımızın tarixində qızıl hərflərlə yazıldığını qeyd edib.

Şəhid Aslan Ağaverdiyevin həyat yoldaşı Zərifə Ağaverdiyeva çıxışında 20 Yanvar Şəhidlərinin göstərdiyi fədakarlığın hər bir azərbaycanlının qəlbində dərin iz buraxdığını bildirib. O, Vətən uğrunda canlarından keçən Şəhidlərin azadlıq və müstəqillik ideallarının təməlini qoyduğunu vurğulayıb.

Tədbirdə çıxış edən Biznesin İdarəedilməsi kafedrasının müdiri, dosent Altay İsmayılov qeyd edib ki, 20 Yanvar hadisələri Azərbaycan xalqının milli iradəsinin simvoludur. O, bu günün gənc nəsildə vətənpərvərlik ruhunun formalaşmasında böyük əhəmiyyətə malik olduğunu bildirib.

Tədbir “Növbəti stansiya – 20 Yanvar” sənədli filminin nümayişi ilə başa çatıb.