https://www.innews.az/uploads/news/2024-12/_innews_d229c904109bf63f50b49bc23_o.jpg
Müasir dünyada süni intellektin artan rolunun insanların həyatına təsirini müşahidə edirik. Hamını maraqlandıran bir sual var: Süni intellekt insan əməyini əvəz edə bilərmi?
Süni intellekt rəsmi olaraq 1956-cı ildə ABŞ-ın Dartmut Kollecində keçirilən bir elmi konfransda yaranır. Bu konfransda “süni intellekt” (artificial intelligence) termini ilk dəfə rəsmi olaraq istifadə olunur. Konfransı təşkil edən alimlər, o cümlədən John McCarthy, Marvin Minsky, Nathaniel Rochester və Claude Shannon, süni intellekti insan zəkasını kompüterlər vasitəsilə təqlid etmək məqsədi kimi müəyyən etmişdilər. Bu hadisə süni intellekt araşdırmalarının başlanğıc nöqtəsi hesab olunur.
Hazırda süni intellektdən səhiyyə, təhsil, maliyyə, nəqliyyat, media, idman və kənd təsərrüfatı kimi müxtəlif sahələrdə istifadə olunur. Bu gün bir çox insan süni intellektdən istifadə edir və bu, onların gündəlik fəaliyyətini asanlaşdırır. Amma müəyyən mənfi cəhətləri də var:
1. Məşğulluğun azalması:
Avtomatlaşdırma səbəbindən bəzi peşələr və iş yerləri yox ola bilər, xüsusilə də təkrarlanan işlərdə.
2. Məlumat məxfiliyi və təhlükəsizlik:
Süni intellekt alətləri şəxsi məlumatları emal etdikdə məlumatların sızdırılması və ya sui-istifadə riski artır. Kiberhücumlarda süni intellekt alətlərindən istifadə təhlükəsizliyi daha da çətinləşdirə bilər.
3. Sosial asılılıq:
İnsanlar süni intellekt alətlərindən asılı olduqda, öz analitik və kreativ qabiliyyətlərini az inkişaf etdirə bilər. Sosial tənbəllik və texnologiyaya həddindən artıq güvən yarana bilər.
4. Yüksək qiymət:
Süni intellekt texnologiyalarını yaratmaq və tətbiq etmək çox bahalıdır. Bu da yalnız müəyyən təşkilatların bu texnologiyalara çıxışını təmin edir.
5. Müharibə və cinayət riski:
Avtonom silahların yaradılması müharibə risklərini artırır. Süni intellekt kibercinayətlər və digər qeyri-qanuni sahələr üçün də istifadə oluna bilər.
Nəticə etibarilə qeyd edə bilərik ki, süni intellekt bəzi sahələrdə insan əməyini üstələsə də, tamamilə əvəz etməsi mümkün deyil. İnsan yaradıcılığı, empatiya və etik düşüncə sahələrində süni intellektin rolu məhduddur. Gələcəkdə insanların süni intellektlə əməkdaşlıqları olacaq. Ona görə də bu sahədə yeni bacarıqlar öyrənmək vacibdir.
Fərhad Musayev
Ən son xəbərləri səhifəmizdən də izləyin
