“Tələbələr üçün Maliyyə təlimləri” layihəsi yekunlaşıb!

Azərbaycan Respublikasının Gənclər Fondunun maliyyə dəstəyi, “Gənclərin Maarifləndirilməsinə Dəstək” İctimai Birliyinin tərəfdaşlığı ilə keçirilən “Tələbələr üçün Maliyyə təlimləri” layihəsi yekunlaşıb.

Layihənin məqsədi ali təhsil müəssisələrində təhsil alan tələbələrdə maliyyə savadlılığının artırılması, onlara büdcə planlaşdırılmasından investisiya strategiyalarına qədər hər şey barədə ətraflı məlumat verməkdir.

Layihə çərçivəsində təlimlər Azərbaycan Dillər Universiteti, Dövlət Gömrük Komitəsinin Akademiyası və Bakı Dövlət Universitetində keçirilib. Təlimlərin hər biri interaktiv formada davam edib.

Qeyd etmək lazımdır ki, layihə rəhbəri Eltac Rəşidzadənin olduğu layihə, Azərbaycan Respublikasının Gənclər Fondu tərəfindən keçirilən “İdeyanı Reallaşdır” qrant müsabiqəsinin qalibidir.

Məlumat üçün bildirək ki, “Gənclərin Maarifləndirilməsinə Dəstək” İctimai Birliyi 30 avqust 2012-ci ildən Azərbaycan Respublikasının Ədliyyə Nazirliyində dövlət qeydiyyatına alınıb və yarandığı ilk gündən etibarən hər zaman gənclər siyasətinə dəstək olaraq, bu sahədə atılan addımlarda ön sıralarda yer alıb.

Birlik gənclərin vətənpərvərlik hisslərinin, dövlətçilik dəyərlərinin yüksəldilməsi, gənclərin asudə vaxtlarının səmərəli və öyrədici formada dəyərləndirilməsi məqsədilə gənclər sektorunda mühüm rol oynayan müxtəlif istiqamətlər üzrə çoxsaylı layihələr həyata keçirir.