https://www.innews.az/uploads/news/2024-09/_innews_c0efb9109b03c9a903fbba657_o.jpg
20 sentyabr 2024-cü il tarixində “Əsrin müqaviləsi”nin 30 illiyi münasibətilə təşkil olunan tədbir çərçivəsində Azərbaycan Respublikası Dövlət Neft Şirkəti (SOCAR) ilə bp arasında enerji təchizatı təhlükəsizliyinin artırılması məqsədilə apstrim neft-qaz layihələri üzrə əməkdaşlıq haqqında Anlaşma Memorandumu imzalanıb.
Memorandum çərçivəsində şirkətlər beynəlxalq səviyyədə karbohidrogenlərin kəşfiyyatı və hasilatı sahəsində sinerji potensialını və bir sıra yeni investisiya imkanlarını birgə araşdıracaqlar.
SOCAR-ın prezidenti Rövşən Nəcəf Azərbaycan üçün tarixi əhəmiyyətə malik “Əsrin müqaviləsi”nin 30-cu ildönümünə təsadüf edən bu sənədin SOCAR ilə bp arasında uzunmüddətli tərəfdaşlıq əlaqələrində yeni səhifə açdığını bildirib. Ümummilli Lider Heydər Əliyevin təşəbbüsü və rəhbərliyi ilə imzalanmış “Əsrin müqaviləsi”nin Azərbaycanın qlobal enerji bazarlarında əsas təchizatçılarından birinə çevrilməsini təmin etdiyini bildirən SOCAR prezidenti Ulu Öndərin müəyyənləşdirdiyi enerji strategiyasına uyğun olaraq, bu gün gələcəkdə təhlükəsiz və dayanıqlı enerji təchizatını təmin etmək üçün yeni imkanların araşdırıldığını, bu istiqamətdə birgə fəaliyyətin davam etdirildiyini diqqətə çatdırıb.
bp-nin Azərbaycan, Gürcüstan və Türkiyə üzrə regional prezidenti Qəri Counz bu gün bp ilə SOCAR yeni əməkdaşlıq mərhələsinin təməlinin qoyulduğunu qeyd edib. Regional prezident SOCAR və bp şirkətinin 30 ildir, Azərbaycanın neft və qaz ehtiyatlarının uğurla işlənməsində birgə çalışdıqlarını, əldə olunan uğurların ölkənin həm region, həm də dünya üçün etibarlı enerji təchizatçısı kimi rolunun möhkəmləndirilməsində mühüm rol oynadığını diqqətə çatdırıb.
Qeyd edək ki, sənəd, həmçinin şirkətlərin dünyaya etibarlı və əlçatan enerji təchizatını təmin etmək imkanlarının qiymətləndirilməsində təcrübə və biliklərini bölüşmək niyyətini əks etdirir.
Ən son xəbərləri səhifəmizdən də izləyin
