https://www.innews.az/uploads/news/2024-08/_innews_24c3cd785ca3d1ccdb37ca219_o.jpg
Vaxtilə Azərbaycanın Ukraynası adlandırılan hal-hazırda 9 min hektar əkin sahəsi olan İsmayıllının böyük taxılçılıq ənənəsi var - "Mühit" Ekoloji Mühafizə İctimai Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Əkin sahələrinin yandırılmasının ekoloji və hüquqi nəticələri” layihəsi üzrə İsmayıllıda keçirilən tədbiri bu sözlərlə açan ictimai birliyin sədri Əzizağa Hünbətəliyev tarlaların əkindən sonra yandırılması hallarının iqtisadi, ekoloji və mənəvi aspektlərini izah etdi, bu sahədə fermerlərin, Kənd Təsərrüfatı, Fövqalada Hallar, Daxili İşlər, Ekolojiya və Təbii Sərvətlər nazirliklərinin və QHT-lərin birgə fəaliyyəti nəticəsində torpağın məhsuldarlığının azalmasına, ərzaq qıtlığına və ekoloji problemlərə səbəb olan belə neqativ halların əsaslı şəkildə azaldığını göstərdi. Fermerlərin COP 29 ərəfəsində ekoloji və hüquqi maariflənməsinin əhəmiyyətini vurğuladı.
İsmayıllı rayon Aqrar İnkişaf Mərkəzinin baş məsləhətçisi Rəşid Zülfüqarov rayonda fermerlərin işindən, onlara göstərilən qayğıdan, Kənd Təsərrüfatı Nazirliyinin apardığı islahatlardan danışdı.
Ekolojiya və Təbii Sərvətlər Nazirliyinin Bioloji Müxtəlifliyin Qorunması Xidmətinin əməkdaşı Vüsal Xankişiyev əkin sahələrinin yandırılmasının torpağın bioloji aktiv qatının məhv edilməsinə səbəb olduğunu elmi faktlarla göstərdi. Belə hallara qarşı birgə mübarizənin və maarifləndirmənin əhəmiyyətini qeyd etdi.
AR Fövqalada Hallar Nazirliyinin Dövlət Yanğın Nəzarəti Xidmətinin Şimal Qərb regional İdarəsinin inspektoru Rövşən Teymurlu yanğının ekoloji fəlakətlərə, maddi zərərə və insanların sağlamlığına vurduğu ziyan haqda məlumat verdi, tarlaların yandırılmasına qarşı regional idarənin gördüyü tədbirləri qeyd etdi. Bildirdi ki, bu işlərin nəticəsində regionda tarlaların yandırılması halına təsadüf edilməmişdir.
Layihənin eksperti hüquqşünas Aydın Kərimov əkin sahələrinin biçindən sonra yandırılmasının yaratdığı hüquqi nəticələrdən və onlara qarşı görülən hüquqi tədbirlərdən danışdı. Cinayət və İnzibati Xətalar məcəllələrinin müvafiq maddələrini izah etdi. COP 29 tədbirlərinin ölkəmizdə keçirilməsinin əhəmiyyətini vurğuladı, bundan sonra ekoloji hüquq pozmalara qarşı mübarizənin daha da sərtləşəcəyini diqqətə çatdırdı.
İştirakçıların çoxsaylı sualları cavablandırıldı, onları maraqlandıran məsələlərlə bağlı geniş müzakirə aparıldı.
Sonra iştirakçılar tarlaların kənarlarında, yanğın riskinin çox olduğu yerlərdə “Odla ehtiyyatlı olun”, Əkin sahələrini yandırmaq qadağandır”, “Tarlaları yanğından qoruyaq” lövhələrini quraşdırdılar.
Ən son xəbərləri səhifəmizdən də izləyin
