Yay Təlim Proqramının iştirakçıları Komitənin Qəbələ Uşaq və Ailələrə Dəstək Mərkəzində olublar

Media tur zamanı gənc jurnalist kadrlar Mərkəzdə göstərilən xidmətlərlə tanış olaraq, icmadaxili xidmətlər və əhali ilə aparılan işlər haqqında məlumat əldə ediblər.

Mərkəzin direktoru Günel Ağayeva ayrı-ayrı xidmət otaqları və həyata keçirilən tədbirlər barədə tələbələrə məlumat verib. O, mərkəzin fəaliyyət istiqamətlərinə uyğun olaraq, psixoloji və pedaqoji dəstək, fərdi məşğələ, sosial iş, treyninq və seminarlar haqqında məlumatları diqqətə çatdırıb. Mərkəzin təlim və konfrans otaqları, asudə vaxtın təşkili məqsədilə ailə klubu və digər texniki otaqlar ilə tələbələri tanış edib.

Daha sonra Komitənin təşəbbüsü ilə yaranan Uşaq Səfirlər Məclisinin Qəbələ üzrə nümayəndələri uşaq hüquqlarının müdafiəsi istiqamətində rayondakı fəaliyyətləri və həyata keçirdikləri layihələr barədə məlumat veriblər.

Qeyd edək ki, 29 iyul - 2 avqust 2024-cü il tarixlərində Qəbələdə keçirilən Yay Təlim Proqramında ali təhsil müəssisələrində jurnalistika ixtisası üzrə təhsil alan III-IV kurs bakalavr tələbələri iştirak edir.