https://www.innews.az/uploads/news/2024-07/_innews_771d4973d7895d6493ed8dfc0_o.jpg
Bəziləri ilə nə tövr rəftar eləyirsən, alınmır ki, alınmır. Məsələn, könül verdiyin birinə deyəndə ki, sağa-sola boylanma, bəs ayıbdır, adamın üzünə qayıdır. Olursan düşmən. Bir süfrədən yemək yediyin dostuna, səndən başqa da adam var, öz payını yedin, bəsdi, çalış, gözünü-əlini masadan çək, deyirsən. Bu da olur adamla qanlı bıçaq. Əşi, dərd burda bitmir ha. Qonşuya da deyirsən, ay qardaş, ay bacı, ay böyük, ay kiçik, əlinə keçəni pəncərədən aşağı tolazlama, zibilini qapının önünə qoyma, ayağını var gücünlə yerə çırpıb gəzmə, yaşayış yerinin həndəvərində tum çırtlayıb ətrafı bulama. Yenə olursan pis adam. Yolda bağırana, parkda adamın üstünə velosiped sürənə, avtobusda avara musiqilərlə qulaq aparan sürücüyə, taksidə sükan arxasında əyləşib siqaret tüstülədənə irad bildirəndə yenə həmən həməndir. Olursan pis adam. Neyləyəsən axı bu naqqallarla, çaqqallarla?! Söz aparıb-gətirənlərlə, ara qatanlarla, paxıl və riyakarlarla?!
Beləcə, düşmənlərinin sayı da artmış olur. Bu düşmənlərin eləsi var ki, hər gün gördüyündü, elələri də var ki, ya nə vaxtsa görərsən, ya da əksinə. Fəqət, bir mənzərə həmişə görünəcək və səni incidəcək... "Pis adam" olmağın.
Bəzən "pis adam" iradı ilə kifayətlənmirlər. Adamın üzünə deyirlər ki, bəs özünü psixoloqa göstər. Bu ağıllı kəslər əksər psixoloqları da instaqram adlanan və əndrabadi "intelligent"lərin toplaşdığı sosial şəbəkədən tapırlar. Ax," öyüd batan yerinə söyüd batanlar"...
Nələr çəkmisən ay Mirzə Cəlil, nələr!.. Belələrinin içərisində "dəli" imzasıyla yazmayasan neyləyəsən axı?.. Sizi indi anlayıram, fikir babamız. "Yol" adlı hekayənizin sonundakı "nəsihəti-hükəman" da çox təsirlidir: "heyvan heyvanlığı ilə bir yoldan keçib yıxılanda dəxi bir də o yoldan keçmir. Sən ki, Allaha şükür, insansan!" ("Molla Nəsrəddin", 14 iyun, 1909, N.24)
Əsgər İsmayılov
Ən son xəbərləri səhifəmizdən də izləyin
