https://www.innews.az/uploads/news/2024-05/_innews_063ce94304fc0b3ee459a6593_o.jpg
2008-ci ildən cənab Prezident İlham Əliyevin təşəbbüsü ilə həyata keçirilən “Bakı Prosesi” ötən müddət ərzində müxtəlif qitələrdə yaşayan fərqli etnik, mədəni, dini ayrı insanlar arasında qarşılıqlı anlayış çərçivəsində səmimiyyət və hörmətə əsaslanan fikir mübadiləsi üçün müsbət platformaya çevrilib. Bu il sayca VI olan Ümumdünya Mədəniyyətlərarası Dialoq Forumu “Sülh və qlobal təhlükəsizlik naminə dialoq” mövzusunda keçirildi. Demək olar ki, dünyanın bütün ölkələrini təmsil edən 700 qonağın iştirak etdiyi Forum beynəlxalq ictimaiyyəti düşündürən bir çox məsələlərin müzakirəsi baxımından olduqca əhəmiyyətli oldu. Əminliklə deyə bilərik ki, Bakı Forumunun iştirakçılarının təmsilçilik səviyyəsi və intellektual potensialı aparıcı beynəlxalq konfranslara uyğundur. Forum iştirakçılarını salamlayan cənab İlham Əliyev çıxışında bir çox məqamlara yer ayırdı. Ölkə başçısı Azərbaycan Qoşulmama Hərəkatına rəhbərliyi dövrünə xüsusi diqqət çəkdi. Ölkəmizin 2019-cu ildə öz üzərinə götürdüyü və 120 dövlətin yekdil qərarı ilə daha bir il – 2023-cü ilin sonunadək uzadılmış sədrliyi dövründə görülmüş işlər barədə xüsusi məqamları vurğuladı.
Qeyd edək ki, Azərbaycanın Qoşulmama Hərəkatına rəhbərlyi dövründə Hərəkatın fəaliyyəti bir qədər də artmışdır. Əminliklə deyə bilərik ki, ölkəmiz Təşkilatın fəaliyyətini canlandırmağa nail olmuşdur.
Təsadüfi deyil ki, cənab İlham Əliyev tərəfindən həmin dövr ərzində müxtəlif beynəlxalq tədbirlər və üç Zirvə toplantısı təşkil edilmişdir. Bundan əlavə Qoşulmama Hərəkatının 60 illik tarixində ilk dəfə Azərbaycanın təşəbbüsü ilə yaradılmış Parlament şəbəkəsini qeyd edə bilərik. Forumdakı çıxışında Dövlət başçısı Ermənistanla Azərbaycan arasındakı münasibətlərə də toxunaraq vurğuladı ki, ölkəmiz qarşı tərəflə münaqişəni hər zaman dinc yolla həll etməyə çalışıb, lakin erməni tərəfi edilmiş təkliflərə heç vaxt konstruktiv yanaşma göstərməyib.
Bu səbəbdən də nəticədə Azərbaycan beynəlxalq hüququn ona verdiyi imkandan istifadə edərək güc tətbiq etmiş, dünyanın gözü önündə işğal altında qalan, eyni zamanda talan edilən suveren ərazilərini azad etmişdir. Cənab Prezident 2020-ci ilin noyabrında müharibə bitdikdən dərhal sonra ölkəmiz tərəfindən sülh danışıqlarına başlamaq üçün təşəbbüs irəli sürüldüyünü Ermənistanla sülh müqaviləsinin əsasını təşkil edəcək 5 baza prinsipin təqdim edildiyini bildirmişdir. Hazırda bu istiqamətdə tərəflər arasında intensiv danışıqlar aparılır. Artıq kiçik də olsa nəticələrin əldə olunması, həm sevindiricidir, həm də gələcəyə ümüdlə baxmağa imkan verir. Bir məsələni də vurğulayaq ki, bu gün bütün dünya Azərbaycanı tolerant ölkə kimi tanıyır və qəbul edir. Çoxkonfensiyalı, çoxmillətli ölkə olan Azərbaycanda azlıqların hüquqları Konstitusiyamız tərəfindən ən yüksək səviyyədə qorunur. “Bakı prosesi” bir daha nümayiş etdirir ki, Azərbaycan sözün əsl mənasında problemli dünyamıza hələ də alternativlərin olması barədə aydın mesajlar verir.
Anar Güllərli;
Neftçala rayon gənci
Ən son xəbərləri səhifəmizdən də izləyin
