https://www.innews.az/uploads/news/2024-04/_innews_64780a9dda9f0969e21041aff_o.jpg
14 aprel 2024-cü il tarixində Azərbaycan Ətraf Mühit İcmasının növbəti – IV Qurultayı baş tutub. Qurultayın məqsədi hesabat-seçki və Strategiya Planının Qurultay tərəfindən təsdiqi olub.
Toplantıya İcmanın İdarəetmə Şurasının üzvü Ülvi Üzeyir oğlu Məmmədov sədrlik edib. Öncəliklə hamını salamlayan Ü.Məmmədov Azərbaycan Ətraf Mühit İcmasının son 4 il ərzində keçdiyi yoldan bəhs edib və gündəliyi elan edib.
Daha sonra İcmanın cari rəhbəri Ceyhun Nizam oğlu Fərzəliyevə söz verilib. O, AzƏMİ-nin onun rəhbərliyi dövründə 1 illik hesabatını iştirakçılara təqdim edib. Çıxış zamanı “ətraf mühitimizi qorumaq və yaşadığımız dünyanın keyfiyyətini yaxşılaşdırmaq məqsədilə burada toplanmış və birgə fikirləşmək üçün bir araya gəlmişik. Bu icma üçün əhəmiyyətli bir gündür. Bizim hədəflərimiz cəmiyyətimizin sağlamlığına və ətraf mühitimizin müdafiəsinə həsr olunmuşdur” – qeyd edib.
Toplantıya sədrlik edən Ü.Məmmədov “Azərbaycan Ətraf Mühit İcması 2024-2026-cı illərdə” Strategiya Planını təqdim edib. Çıxışında qeyd edib ki, İcma ətraf mühitdə tarazlığın qorunması, su, torpaq, hava kimi əvəzsiz sərvətlərin idarə olunması və biomüxtəlifliyin mühafizəsi üçün fəaliyyət göstərməkdədir. Bu strateji plan İcmanın uzunmüddətli məqsədlərinə nail olmaq və effektivliyini artırmaq üçün tərtib edilib. Plan doqquz geniş məqsəd və xüsusi məqsədləri, hərəkətləri, qrafikləri, nisbi fəaliyyətləri və ətraf mühitin ekoloji inkişafını müəyyən etməyə kömək edən xüsusiyyətlərin qorunmasında irəliləyişin ölçülməsi yollarını təsvir edən həyata keçirmə strategiyasını təmin edir. Planın hazırlanması zamanı dayanıqlı inkişaf siyasətləri və iqlim dəyişikliyi üzrə fəaliyyətlə bağlı öhdəliklər nəzərdən keçirilmişdir.
Növbəti müddətdə Qurultay öz işinə seçki mərhələsi ilə davam edib. Səsvermə nəticəsində məlum olub ki, Ceyhun Fərzəliyev növbəti bir il ərzində də İcmaya rəhbərlik edəcək.
İdarəetmə şurasına İntiqam Rzayev, Ülvi Məmmədov, Vəfa Musayeva və İslam Şükürov seçiliblər.
Nəzarət-Təftiş şurasına Pərvanə İsmayılova, Eltun Alıyev və Yusif Məmmədəli seçiliblər.
Yekunda İcmanın üzvü Nurlan Kərimov tərəfindən ekoloji mövzuda nitq söylənmiş, suallar cavablandırılmışdır.
Ən son xəbərləri səhifəmizdən də izləyin
