https://www.innews.az/uploads/news/2024-04/_innews_0c79eb6d23eed3ebcf900572a_o.jpg
"Sabirabad Gənclər evi"nin fəaliyyət istiqamətlərindən biri də kənd bölgələrində təhsil alan gənclərin cəmiyyətə inteqrasiyası prosesində aktiv iştirak etməkdir. Bu məqsədlə "Sabirabad Gənclər evi"nin təşkilatçılığı ilə "Kənd Gənclərinin İnkişaf Proqramı" layihəsinin icrasına başlanıb.
Layihə çərçivəsində növbəti görüş rayonun Yaxa-Dəllək kəndində keçirilib.
Ə. Xanlarov adına Yaxa-Dəllək kənd tam orta məktəbində təşkil olunan görüş zamanı məktəb rəhbərliyi ilə gənclərin inkişafı istiqamətində icra olunacaq təlim və görüşlər müzakirə edilib, məktəblilər və gənc müəllimlər üçün "Sabirabad Gənclər evi"nin fəaliyyəti ilə bağlı təqdimat keçirilib.
Təqdimat sonrası hərəkətli oyunlar təşkil edilib və aktiv gənclər sertifikat və hədiyyələrlə təltif olunublar.
"Xoşbəxt mən" adlı təlim zamanı həyatdakı motivasiya qaynaqlarımızı müəyyənləşdirmək, bizi irəli aparan və uğur qazanmağımıza səbəb olan hadisələr, insanlar və prosesləri düzgün nəzərdən keçirmək barədə məktəblilərlə müzakirə aparılıb. Sahib olduğumuz imkanlar üçün daim təşəkkür halında olub bunlardan ilhamlanaraq yeniliklərə doğru imza atmağın önəmindən danışılıb.
Məktəblilər arasında "Nə? Harada? Nə zaman?" formatında intellektual yarış zamanı isə qaliblər "Sabirabad Gənclər evi" tərəfindən diplom və kubok ilə təltif olunublar.
Sonda Ə. Xanlarov adına Yaxa-Dəllək kənd tam orta məktəbinə təşəkkürnamə və xatirə hədiyyəsi təqdim edilib.
"Sabirabad Gənclər evi" tərəfindən keçirilən "Kənd Gənclərinin İnkişaf Proqramı" layihəsinin gənclər arasında böyük bir maraqla qarşılanması və regionlardakı gəncliyin inkişafı baxımından faydalı töhfələr verməsi səbəbi ilə davamlı şəkildə icrası nəzərdə tutulur.
Ən son xəbərləri səhifəmizdən də izləyin
