https://www.innews.az/uploads/news/2024-03/_innews_111e7257c9ab31c618aba5e6b_o.jpg
18 mart 2024-cü il tarixində Prezident İlham Əliyev işğaldan azad olunmuş Xankəndi şəhərindəNovrzu tonqalını alovlandırdı.Çox əsrlik tarixi ənənələrə söykənən, milli-mənəvi dəyərləri özündə birləşdirən, Azərbaycanın ən qədim bayramlarından biri də Novruz bayramıdır.Bu il Azərbaycan xalqı Novruzu dövlət müstəqilliyimizin bərpasından sonra ilk dəfə olaraq ölkənin bütün ərazisində, o cümlədən Xankəndidə, Xocalıda, Ağdərədə, Xocavənddə, Qarabağın və Şərqi Zəngəzurun bütün guşələrində böyük coşqu ilə qarşılayır.Novruz bayramının ölkəmizdə dövlət səviyyəsində keçirilməsində Ümummilli Liderimiz Heydər Əliyevin müstəsna xidməti vardır. Bu, Ulu Öndərin öz xalqına, onun qədim, zəngin tarixinə, mədəniyyətinə, milli adət-ənənələrinə tükənməz məhəbbətinin əyani təzahürü idi. Bütün həyatı və siyasi fəaliyyəti dövründə milli dəyərlərimizə ehtiram göstərən Ümummilli Lider siyasi hakimiyyətə yenidən qayıtdıqdan sonra milli və tarixi bayramlarımızı bərpa etmiş, onlara ümummilli bayram statusu vermişdir. Ümummilli Lider 1998-ci ildə etdiyi çıxışlarından birində demişdi: “Gün o gün olacaq ki, Novruz bayramını bir dəfə Şuşada, o biri il Laçında, o biri il Kəlbəcərdə, Ağdamda, Füzulidə, Cəbrayılda, Zəngilanda, Qubadlıda keçirəcəyik. Əminəm ki, belə də olacaqdır. Mən buna inanıram və bu inamla yaşayıram, bu inamla işləyirəm və bu inamla da Azərbaycan xalqına rəhbərlik edirəm.”
Bu tarixi çıxışdan 22 il sonra Ölkə Prezidenti cənab İlham Əliyev Ulu Öndərin bu vəsiyyətini də yerinə yetirdi. Rəşadətli Azərbaycan Ordusu Müzəffər Ali Baş Komandan cənab İlham Əliyevin rəhbərliyi ilə Vətən müharibəsini tarixi Qələbə ilə başa vuraraq mənfur erməni qəsbkarlarını torpaqlarımızdan qovdu, torpaqlarımızın 30 illik işğalına son qoydu. Daha iki ildən sonra isə, ölkəmiz özünün ərazi bütövlüyünü və tam suverenliyini bərpa etdi.
Prezident cənab İlham Əliyevin həyata keçirdiyi siyasətin nəticəsində bu gün biz ölkəmizdə milli həmrəyliyin, vətəndaş birliyinin şahidiyik. 44 günlük Vətən müharibəsində, eləcə də 23 saat davam edən antiterror tədbirlərində hər bir vətəndaşımız bir yumruq kimi birləşərək erməni faşizminə qalib gəldi, Qarabağı işğaldan azad etdi. Artıq işğaldan azad olan bütün torpaqlarımızda bayram tonqalları yandırılır, burada böyük quruculuq işləri aparılır. Ölkədə yaranan siyasi dialoq və əməkdaşlıq öz mühüm töhfəsini verməkdədir. Bu gün ən başlıca vəzifə uğurla icra olunmuş və torpaqlarımız Möhtərəm Prezidentimiz İlham Əliyevin rəhbərliyi ilə geri qaytarılmışdır. İndi isə məqsəd illərdir öz doğma torpaqlarından didərgin düşmüş həmvətənlərimizin öz yurd-yuvalarına geri dönüşünün təmin olunmasıdır. Bu məqsədlə artıq 4-cü ildir ki, erməni vandalizmi nəticəsində dağıdılmış işğaldan azad olunan torpaqlarımızda bərpa-quruculuq işləri həyata keçirilir. Aradan az bir müddət keçməsinə baxmayaraq artıq bir çox ərazilərdə həyat bərpa olunmuş, illərdir öz yurd-yuvalarına həsrət qalmış vətəndaşlarımızın bir hissəsinin doğma torpaqlarına geri dönüşü təmin olumuşdur.Vətən yolunda öz canını fəda edən igid Azərbaycan əsgəri bu nailiyyətin əsas qəhrəmanı oldu. Xankəndidə Azərbaycan xalqına müraciətlə Novruz təbrikində Azərbaycan gəncliyinin öz milli-mənəvi dəyərlərinə bağlılığını, Vətən sevgisini xüsusi vurğulayan cənab Prezident qeyd etdi: “Elə bir gənc nəsil yetişdirildi ki, bu gənc nəsil bizim xalqımız üçün əbədi qürur mənbəyi olacaq və bütün dünyaya Azərbaycan xalqının böyüklüyünü nümayiş etdirmişdir. Bizim gənclərimiz vətənpərvərlik ruhunda, milli ruhda yetişdirildi, üç il bundan əvvəl torpaqlarımızı azad etmək üçün ölümə getməyə hazır idilər və ölümə gedirdilər. Şübhəsiz ki, illər, əsrlər keçəcək, ancaq qəhrəman əsgər və zabitlərimizin şücaəti, qətiyyəti, döyüş ruhu, Vətən sevgisi heç zaman yaddaşlardan silinməyəcək. Xalqımız bu uğurda canından keçmiş əsgər və zabitlərimizin əziz xatirəsini daim yad edəcəkdir.”
Azərbaycan xalqı bu gün Novruz Bayramını öz ərazi bütövlüyünü tam tamin edərək, işğaldan azad edilmiş bütün torpaqlarında qeyd edir. Ölkə Prezidenti İlham Əliyev Novruz bayramı münasibətilə Azərbaycan xalqına ünvanladığı təbriklərdən birində demişdir: “Azərbaycan torpağında çox qədim kökləri olan, uzaq keçmişlərdən xalqımızın mənəvi həyatının ən dərin qatlarına nüfuz edən və zamanın sınaqlarından günümüzədək uğurla çıxan Novruz bayramı ənənəvi dəyərlər sistemimizin təşəkkülündə müstəsna əhəmiyyətə malikdir. Əcdadlarımızın müqəddəs yadigarı kimi bu bayram təbiətin ilahi nizamına ehtiramın aydın ifadəsidir.” Bu gün Novruz artıq siyasətdə də bayramlaşma təcrübəsinə səbəb olmuşdur. Novruz bayramı münasibətilə Azərbaycan Respublikasının Prezidenti cənab İlham Əliyev ilə ölkəmizdə fəaliyyət göstərən siyasi partiyaların rəhbərləri arasında qarşılıqlı bayramlaşma ölkədə yeni, mütərəqqi siyasi mədəniyyətin təşəkkül tapdığını nümayiş etdirir.
Gülşən Piriyeva,
Salyan şəhəri, Əməkdar müəllim
Ən son xəbərləri səhifəmizdən də izləyin
