"Dinlərarası harmoniya" Festivalı

Ölkəmizdə fəaliyyət göstərən dini qurumların birgə təşkilatçılığı ilə 2024-cü il mart ayının 8-də “Dinlərarası harmoniya” festivalı keçiriləcək.

Ölkəmizdə mənəvi dəyərlərin, tolerant və multikultural ənənələrin inkişafı və təbliği məqsədilə təşkil olunan festivalda Qafqaz Müsəlmanları İdarəsi, Rus Pravoslav Kilsəsinin Bakı və Azərbaycan Yeparxiyası, Dağ, Avropa, Gürcü yəhudiləri, Roma Katolik Kilsəsinin Apostol Prefekturası, Azərbaycan Bibliya Cəmiyyəti (protestant yönümlü icmalar), Azərbaycan Bəhailəri Dini Mərkəzi, Alban-Udi Xristian dini icması, Krişna Şüuru, gürcü pravoslav, Molokan ruhani xristian və digər dini qurumların fəaliyyətini əks etdirən fotosərgi, sənədli filmlər, videoçarxlar və musiqi proqramı nümayiş etdiriləcək.

Festivala Bakı şəhərində keçiriləcək “Müxtəlifliyin qorunması: 2024-cü ildə islamafobiya ilə mübarizə” konfransında iştirak edən xarici qonaqların da qatılacağı gözlənilir.

Qeyd edək ki, festival zamanı ölkəmizdə dini etiqad azadlığı üçün yaradılmış münbit şərait, milli-mənəvi dəyərlərə, ibadət yerlərinə göstərilən qayğı, dövlətlə dini qurumlar arasında qarşılıqlı anlaşma və əməkdaşlıqla bağlı reallıq ictimaiyyətin diqqətinə çatdırılacaq. Eyni zamanda Azərbaycanda bütün xalqların və dinlərin nümayəndələrinin hüquqlarının, etiqad azadlığının təmin olunması, etnik və dini mənsubiyyətindən asılı olmayaraq, dövlətin hər bir vətəndaşına eyni dərəcədə diqqət və qayğı göstərməsi əyani nümayiş etdiriləcək.