https://www.innews.az/uploads/news/2023-11/_innews_663f9b1fbe63d137a28762b7a_o.jpg
Azərbaycan Respublikasının Mediasiya Şurası və Gürcüstan Mediatorlar Assosiasiyası arasında olan səmərəli əməkdaşlıq davam edir.
23 oktyabr 2023-cü il tarixində Gürcüstan Respublikasının paytaxtı Tbilisi şəhərində Avropa Şurası və Gürcüstan Mediatorlar Assosiasiyasının birgə təşkilatçılığı ilə Gürcüstanda mübahisələrin alternativ həlli mexanizmlərinin təşviqi layihəsi çərçivəsində keçirilən seminarda Mediasiya Şurasının nümayəndəsi Yunis Nəsibov iştirak etmişdir.
Tədbirdə Avropa Şurasının ölkə üzrə nümayəndəsi, Avropa Şurasının məsləhətçiləri, Gürcüstan Mediatorlar Assosiasiyasının rəhbəri İrakli Kandaşvili, Assosiasiyanın Komissiya rəhbərləri və üzvləri və digər təşkilatların nümayəndələri ilə yanaşı Azərbaycan Respublikası Mediasiya Şurasının nümayəndəsi, 9 Saylı Mediasiya Təşkilatının təsisçisi və mediatoru Yunis Nəsibov da iştirak etmişdir.
Seminarın əsas məqsədi mübahisələrin alternativ həlli mexanizmlərindən olan mediasiyanın təşviqi, beynəlxalq ekspertlərin və mediatorların mediasiyada etik əsasların və prinsiplərin vacibliyi ilə bağlı perspektivlərinin bir araya gətirilməsi yolu ilə müzakirəsi olmuşdur. Tədbirdə mediatorların və Etika və İntizam Komissiyasının əməl etməli olduqları tələb və şərtlərin təhlili aparılmış, mediatorlara etik prinsiplərin real mediasiya ssenarilərində tətbiqi barədə praktiki təlim keçirilmiş və digər ölkələrdə mediatorlar üçün mövcud olan etik standartlar və intizam prosedurları barədə fikir mübadiləsi aparılmışdır. Eyni zamanda, Avropa Şurasının beynəlxalq ekspert və məsləhətçiləri tərəfindən praktiki kazuslar üzrə İtaliya və Niderland Krallığı təcrübəsi müqayisəli şəkildə təqdim edilmişdir.
Tədbir çərçivəsində Azərbaycan Mediasiya Şurasının nümayəndəsi Yunis Nəsibov iştirakçılara Azərbaycanda mediasiya sahəsində Mediasiya Şurası tərəfindən görülmüş işlər barədə, Bakı KOB Evində və DOST mərkəzlərində yaradılan mediasiya məkanları və mediasiya təşkilatlarının iş prinsipi barədə ətraflı məlumat vermiş və son dövrdə Azərbaycanda mediasiyanın inkişafı istiqamətində aparılan tədbirlər barədə fikirlərini bölüşmüşdür.
Ən son xəbərləri səhifəmizdən də izləyin
