https://www.innews.az/uploads/news/2026-08/_innews_fa4e2c6f01b7a9bf57b3f9dbd_o.jpg
21 fevral 2023-cü il tarixində “Dəyərlərimizə sahib çıxaq” adlı layihə çərçivəsində Şamaxı rayonunda maarifləndirici tədbir keçirilib. Tədbir “Qeyri-maddi mədəni irsin təbliği” QHT və “Sağlam yaşa” QHT-nin birgə təşkilatçılığı ilə Şamaxı Dövlət Regional Kollecində baş tutub.
Tədbirin əvvəlində iştirakçılar qardaş Türkiyədə baş vermiş güclü zəlzələ nəticəsində həlak olan insanların əziz xatirəsini bir dəqiqəlik sükutla yad ediblər.
Tədbiri giriş sözü ilə Şamaxı Dövlət Regional Kollecinin direktoru, iqtisadiyyat üzrə fəlsəfə doktoru İlham Vəliyev açaraq iştirakçıları salamlayıb. O, layihənin əhəmiyyətindən danışaraq qeyd edib ki, belə tədbirlərin keçirilməsində əsas məqsəd milli-mənəvi dəyərlərimizin qorunması, gənc nəslə çatdırılması və cəmiyyət arasında bu istiqamətdə maarifləndirmə işlərinin gücləndirilməsidir.
Daha sonra Gənclər təşkilatının təlimçisi, tarix üzrə fəlsəfə doktoru, dosent Afət Rüstəmbəyova tədbir iştirakçılarını salamlayaraq layihənin məqsəd və vəzifələri haqqında geniş məruzə ilə çıxış edib. O, çıxışında bildirib ki, xalqımızın əsrlər boyu formalaşmış zəngin mədəni irsi, adət-ənənələri və mənəvi dəyərləri milli kimliyimizin əsasını təşkil edir. Lakin son dövrlərdə bəzi dəyərlərimizin müəyyən aşınmalara məruz qaldığını və xüsusilə gənc nəsil arasında onlara olan münasibətin əvvəlki kimi qənaətbəxş olmadığını vurğulayıb.
Afət Rüstəmbəyova qeyd edib ki, ailə dəyərləri, böyüyə hörmət, kiçiyə qayğı, milli adət-ənənələrə bağlılıq, vətənpərvərlik və digər mənəvi prinsiplər xalqımızın keçmişdən bu günə qədər qoruyub saxladığı ən mühüm sərvətlərdəndir. Bu dəyərlərin yaşadılması və gələcək nəsillərə ötürülməsi hər bir vətəndaşın üzərinə düşən mühüm vəzifələrdəndir.
Tədbirdə çıxış edən “Sağlam Həyata doğru” ekoloji ictimai birliyinin sədri, kimya üzrə fəlsəfə doktoru Sadiq Həsənov gənclərə müraciət edərək milli-mənəvi dəyərlərimizə hörmətlə yanaşmağın vacibliyini diqqətə çatdırıb. O bildirib ki, dəyərlər yalnız keçmişin mirası deyil, həm də gələcəyimizin formalaşmasında mühüm rol oynayan amillərdir. Sadiq Həsənov gəncləri bu dəyərləri qorumağa, onları olduğu kimi gələcək nəsillərə çatdırmağa çağırıb.
Tədbir zamanı kollecin tələbələri də mövzu ilə bağlı fikirlərini bölüşüblər. Tələbələrdən Nigar Sultanova, Rəvan Məmmədov, Taleh Xalidov, Gülgəz Sultanova və digər iştirakçılar milli dəyərlərin qorunmasının vacibliyindən danışaraq, gənclərin bu sahədə üzərinə düşən məsuliyyətləri qeyd ediblər.
Sonda iştirakçılar belə tədbirlərin milli-mənəvi dəyərlərimizin təbliği, gənclərin maarifləndirilməsi və cəmiyyətin bu istiqamətdə fəallığının artırılması baxımından mühüm əhəmiyyət daşıdığını vurğulayıblar.
Ən son xəbərləri səhifəmizdən də izləyin
